Politique

Partagé sur :
• facebook

Fahombiazana ny hetsika voalohany nataonay tamin’ny sabotsy, hoy ireo mpitarika ny fitakiana ny famerenana ny « iles éparses » amin’i Madagasikara. Nanapa-kevitra ny hanohy ny fidinana an-dalambe izy ireo anio manomboka amin’ny 10 ora maraina.

 Fanombohana  ihany iny tamin’ny sabotsy  iny, hoy  ireo mpitarika  ny hetsika fa manomboka izao dia hihamatevina sy  hihamafimafy  kokoa ny endriky ny fitakiana. Heno ihany  koa fa omaly maraina  dia efa nivory maika ny  mpitondra eto Antananarivo Renivohitra sy ny  mpitandro ny filaminana. Tsy nisy nipika ny resaka nandritra ny fivoriana saingy  azo inoana fa tsy maintsy  voaresaka ny momba ity  hetsika kasain’ny  fikambanana mitaky ny  famerenana  ireo nosy malagasy hatao ity. Nandritra ny  fihaonany tamin’ny  mpanao gazety teny amin’ny  lapan’i Iavoloha  moa ny Filoham-pirenena dia nanamafy fa efa misy ny  hetsika ara-politika  avo lenta atao mikasika ity  fitakiana ireo nosintsika amin’ny  frantsay ity. Ny Filoha izay  sady  nanao tsindrom-paingotra kely ihany nanao  hoe maro ny  fanjakana nifandimby  teto  kanefa  nahoana  no  izao vao tena  mivaivay ny  fitakian’ireo  milaza  ho tia tanindrazana izay  teo foana  hatrizay ? Tsy ho fampitahorana  fa  tranga azo  inoana fa mety hiseho ny hivadihan’ity hetsika  ity ho korontana  mahatsiravina  indray satria tsy  azo odian-tsy hita  ireo  tia  manararaotra  ny  hetsika toy  izao  mba handrobana fananan’olona,  indrindra  moa  fa  mahakasika  vahiny  ity  fitakiana  ity. Tsy vitan’izay fa mampihozongozona  ny fahefana  misy koa ny toe-javatra  toy izany  satria  haharatsy sary ny fitondrana   eo imason’ny  fianakaviambe   iraisam-pirenena  izany raha tsy voafehy. Iaraha-mahalala rahateo fa misy  amin’ny  mpanao  politika no  miandry izany  fotsiny mba  handrodanana ny  rafi-panjakana  misy fa miafina  ao ambadik’ilay fitakiana izay azo heverina  anefa  fa rariny sy zon’ny Malagasy tanteraka.

Andry Ratovo 

Tia Tanindrazana

Samia mijoro ho an'i Gasikara.