Politique

Partagé sur :
• facebook

Amin’izao ankatoky ny faran’ny taona sy amin’ny fiandrandrana ny fetin’ny Asaramanitra izao dia mihazakazaka ny toe-draharaha momba ireo fanakianana maro be momba ny Filoham-pirenena sy ny fianakaviany.

 Miha mahantra ny Malagasy, misy ny tsy misakafo afa-tsy indray mandeha isan’andro kanefa toa misy vola be ana miliara ariary mivoaka an-tsokosoko eto ary manampahefana ambony no mitondra azy, mitohy koa ny trafika isan-karazany olona manan-katao sy mpanambola ary manampahefana foana no voatonontonoana amin’ireny afera maizina ireny.

Mpanolotsaina mampijabaka ?

Vehivavy tandapa mpanolotsain’ny Filoham-pirenena, Rtoa  Nicole Andrianarison  izay tena olona akaiky ny vadin’ny Filoham-pirenena  ihany  koa no arahin’ny polisy frantsay maso akaiky  ankehitriny noho ny volabe mitentina 3 tapitrisa  euros, izany hoe 10 422 000 000 Ar eo ho eo raha heverina fa 3474 Ar ny euro iray, tratra teny aminy tany Frantsa. Mipetraka avy hatrany ny fanontaniana teo amin’ireo polisy frantsay nanao hoe avy taiza ireo vola be ireo ary hanaovana inona ? Nisy ny vaovao tonga  teo amin’ireo  polisy vahiny  ireo  nanamafy fa vidina  boaderôzy  ireo fa ity  ramatoa ity no nirahana naka izany tany ivelany tany. Misy loharanom-baovao hafa indray  milaza  fa avy aty  Madagasikara  ilay vola. Dia  hataon’ity  ramatoa ity inona ? Ary volam-panjakana ve izany ireo ? Inona fotsiny no ataon’ny  mpiasan’ny  fadintseranana tsy  mahita izany ? Efa  mahalala ity  raharaha ity ihany koa moa ireo masoivohon’ny firenena vahiny rehetra  mpamatsy vola eto Madagasikara ka andrasana ny ho fihetsik’izy ireo. Ity ramatoa voalaza ity dia tsy vao  izao no re laza amin’ny fahaiza-manaony fa  rehefa misy  raharaha  lehibe mahakasika ny tombontsoan’ny olona akaiky ny Filoham-pirenena  tafiditra ao amin’ny fitsarana dia izy no miditra an-tsehatra ka mibaiko ny mpitsara. Hatrany amin’ny  fiadidiana ny  praiminisitra any dia fantatra fa idiran’ity ramatoa ity avokoa ny asam-panjakana tsy manandrify azy. Ary mety izay izany no mahatonga ilay  fitsarana manokana momba ny andramena sy  ny harena sarobidy hafa tsy mety voapetraky ny  praiminisitra hatramin’izao. Ankoatr’izay  dia mandoto sy manaratsy endrika an’i  Hery Rajaonarimampianina ihany koa ity raharaha 3 tapitrisa euros ity. Ankoatra izay, mbola afera hafa iandrasana fanazavana avy aminy ilay  resaka fitrandrahana vato sy fanaovana takalon’aina  olona tany Anjozorobe ka maha voatonontonona  olona voalaza fa rahalahiny. Manampy ireo rehetra ireo dia efa malaza ho lava tanana sy miditra lalina amin’ny fitantanan-draharaham-panjakana Rtoa Voahangy Rajaonarimampianina ka maro ny olona efa tezitra amin’ny ataony. Ny zanaka lahin’ny filoham-pirenena ihany koa dia efa im-betsaka no voatonontonona amina afera tsy dia mazava tany amin’ny seranan-tsambon’i Toamasina sy tany ivelan’i Madagasikara. Mbola resaka hafa ny tsindry bokotra sy fanaparam-pahefana ataon’ireo olon’ny HVM, ka mahatonga ny mpamatsy vola malaina hanampy antsika satria amin’izy ireo dia tahaka ny “mafia” mihitsy no mitazona ny fahefana eto ka noho izany tsy azo itokisana.

Andry Ratovo   

Tia Tanindrazana

Samia mijoro ho an'i Gasikara.