Hery Rajaonarimampianina

« Asa arahina ezaka no fototry ny fahombiazana »

Politique
Zoma 29 Desambra 2023

Anisan’ireo naneho ny heviny manoloana ireny asa « en ligne » lazaina fa mampitombo vola

ireny ny Filoha teo aloha Hery Rajaonarimampianina. Nambarany fa tato anatin'ny dimy taona farany, dia tena betsaka ireo malagasy no roboka tamin'irony lazaina fa fampiasam-bola haingana amin'ny « internet » irony, tsy mila miasa fa mipetraka ao an-trano dia mandray vola hoy ny sasany. Saingy ny mampalahelo dia very ao anatin'ireny ilay vola kely ananana nokasaina mba hampitomboina. « Antony goavana mahatonga ny malagasy liana sy roboka amin'izy ireny dia ny tsy fisian'ny asa sy ny fahambanian'ny mari-karama eto Madagasikara izay tsy ampy hivelomana ka zara aza misy mampanantena vola haingana. Ankoatra izay, nozarin'ny mpitondra tolorana foana ny vahoaka ka tsy te hisasatra intsony fa lasa miantehitra amin'ny zavatra mora azo sisa. Ampy izay ny fanambakana sy fanabadoana ny malagasy, ampy izay ny fanazarana ny malagasy amin'ity tolotra mora lava ity. Asa arahina ezaka izay no fototry ny fahombiazana sy fivoarana", hoy i Hery Rajaonarimampianina. Tsara ny mampahatsiahy, fa manam-pahaizana momba ny toekarena ity Filoha teo aloha ity.
Toky R