Politique

Partagé sur :
• facebook

Miondrika am-panajana manoloana ny vata-mangatsiakan'ireo izay namoy ny ainy nandritry ny fitifirana variraraka niseho tao Ikongo ny 29 aogositra teo ka namoizana ain'olona miisa 23 ary maratra mafy 40 mahery ny tenako,

hoy ny mpandrindra nasionalin’ny antoko politika Maitso, Haingosoa Hortençia Antoinesie, ary miara-miombon'alahelo amin’ny fianakavian'ny maty sy ny vahoakan'Ikongo iraimanontolo. Mirary fahasitranana haingana ho an'ireo izay mbola mitsabo tena, hoy izy. Mankasitraka ny ezaky ny fitondram-pajakana foibe amin’ny fandraisana an-tanana ireo niharam-boina ary mangakata ny fampiharana ny lalàna velona misy eto amin’ny tany sy ny firenena ho amin’ireo izay nahavanon-doza sy tompon'antoka nahatongavana tamin’izao toe-javatra mampalahelo izao. Manameloka tanteraka amin’ny hery rehetra ny famonoan'olona faobe tahaka izao na inona na inona antony. An’Andriamanitra irery ihany ny aina. Entina ho aiza ity firenentsika ity raha toa ka izay nanankinana ny aina amin’ny resaka fitandroana ny filaminana sy hiaro ny vahoaka sy ny fananany indray no ho lasa loza mitatao ho an'ny vahoaka toy izao sanatriavina? Ain'olona miisa 4 voarohirohy ve no narovana dia ain'olona 23 be izao no nafoy? Ain'olona 40 mahery tandindomin-doza sy fianakaviana an-jatony no nidonam-pahoriana? Tsy fahatokisan'ny vahoaka ny rafitra rehetra misy eny ifotony intsony no anton'ny fangatahana hanao fitsaram-bahoaka. Izany angamba satria efa loza mitatao ho an'ny fiarahamonina ireo olona ireo. Noho izany, mila fanovàna fomba fiasa avy aty ambony mipàka eny ifotony izany izay rafitra sy sampan-draharaha voakasik'izao raharaha izao mba hiverenan'ny fitokisan'ny vahoaka tsikelikely raha tiana hilamina sy hirindra ny fiarahamonina fa tsy vao androany akory no nahenoana izany fangalarana varira sy voamaso varira sy taova varira izany tompoko nefa matetika dia herim-po very maina ny an'ireo fianakaviana voakasik'izany, hoy hatrany ny tenany.
J. Mirija 

Tia Tanindrazana

Samia mijoro ho an'i Gasikara.