Politique

Niasa avy hatrany ireo mpanelanelana. Ny maraina dia solontena vitsy, toa an’i Norbert Lala Ratsirahonana, no nihaona tamin’ny Groupe international de Contact na GIC notarihin’ny filohan’ny vaomiera eo anivon’ny firaisambe afrikanina. Ny Praiminisitry ny marimaritra iraisana, Mangalaza Eugène, avy eo no nifampidinika tamin’izy ireo. Nisafidy ny tsy haneho hevitra aloha Ingahy Mangalaza rehefa nivoaka ny efitrano nifampidinihana. Taorian’izany dia noraisin’ny GIC koa ny Praiminisitry ny FAT, Albert Vital Camille, izay nilaza fa tsy maintsy ny fifidianana ihany no hiafarana. Ankoatra izay dia nihaona tamin’ireo filoha mpiara-mitantana 2, Emmanuel Rakotovahiny sy Fetison Rakoto Andrianirina, ireo vahiny, avy eo moa dia niazo an’Ambohitsorohitra Ingahy Ping. Ny tolakandro kosa dia ireo delegasiona avy amin’ireo ankolafy tsirairay no nifampidinika tamin’ireto mpanelanelana. Nanana ora iray teo ho eo avy ny ankolafy isanisany. Tsy azo natrehana moa ny dinika rehetra, fa raha ny tatitra tsotra nataon’izay rehetra nivoaka avy tao amin’ny efitrano nivoriana dia nitovy ny feo. Nandroso tolo-kevitra ny GIC, tolo-kevitra tsy miala amin’izay tapaka sy nosoniavina tany Maputo sy Addis Abeba. Tsy fifampidinihana intsony no hatao, hoy ny filoha mpiara-mitantana Emmanuel Rakotovahiny, fa ny fijerena izay hampiharana sy ny hanatanterahana araka ny tokony izy ireo fifanarahana tenierana rehetra. Handinika ny tolo-kevitra naroson’ny GIC aloha izahay, hoy kosa Fetison Rakoto Andrianirina, filoha mpiara-mitantana. Nanambara ity mpitantana ny delegasion’ny ankolafy Ravalomanana ity fa tsy ho ela, mety anio ihany, dia mety ho fantatra izay ho hevitry ny ankolafy misy azy. Tompon’andraikitra avokoa isika rehetra raha tsy mahomby izao fitadiavam-bahaolana izao, hoy kosa i Ange Andrianarisoa, mpitarika ny delegasion’ny ankolafy Ratsiraka, izay nanamarika ihany koa fa hetsika ihany ankolafy Madagasikara. Ny fitakiana ny fampiharana ireo fifanarahana vita sonia tany Maputo sy Addis Abeba ihany no iraisan’ireo ankolafy 3 ka nahatonga ny fivondronana, hatreo ihany, araka ny fanazavana. Tsy noresahana tamin’ity fihaonana ity koa ny momba ny Maputo 3, izay noheverina ho tsy nisy ary tsy manan-kery. Tany amin’ny 6 ora sy sasany tany vao nigadona teny an-toerana ny ankolafy Rajoelina. Taorian’ny fihaonana tamin’ity ankolafy ity dia nifampidinika tamin’ireo masoivoho monina sy miasa eto amintsika ny GIC. Tsetsatsetsa no ilazana fa nandritra ny fotoana nanapoahan’ireo miaramila tety ivelany ny lakrimozena dia tratr’izany koa ireo mpanelanelana tao amin’ny trano fivoriana ka samy namoaka ny mosoarany avy. Fantatra ihany koa fa dia efa nahita trano eto Madagasikara ireo mpanelanelana iraisam-pirenena hijery ny firosoan’ny dingana fampiharana ireo fifanarahana.

Soa