FIFIDIANANA SOLOMBAVAMBAHOAKA

Ny fahamarinana no mampandroso ny firenena, hoy Pastera Heritiana

Politique
Alakamisy 06 Jona 2024

Anisan’ny mitana ny sain’ny mpanara-baovao rehetra amin’izao ny mety ho vokatry ny fifidianana

solombavambahoaka notanterahina ny 29 May lasa teo. Lasa mitsombadika ambony ambany mantsy izany ho an’ny kaominina sy distrika sasany izay ahiana hiteraka korontana mihitsy. Naneho ny heviny mifandraika amin’izany Pastera Heritiana Randriarimalala, tompon’andraikitra voalohany eo anivon’ny trano Fivavahana Vahao ny oloko omaly. Nambarany fa izay tompon’ny fahefana ihany no tompon’ny lakile eto amin’ny tany sy ny firenena. Ny vahoaka no tompom-pahefana hoy izy ary efa nasehony tamin’ny alalan’ny fifidianana izay olona tiany hisolo vava azy eo anivon’ny Antenimieram-pirenena izany. Tokony hajaina araka izany hoy izy ny fahamarinana fa ny fahamarinana no mampandroso ny firenena. Izay resy hoy izy dia tokony hahazaka resy ary hanana toe-po mahay mandefitra fa tsy maintsy misy lalan’Andriamanitra hitondrany izany olona izany foana ao ambadika ao. Ho an’ireo naharesy kosa izy dia tsy tokony handraraka ilom-by an-doha ny fitokisana napetraky ny vahoaka taminy mba hahafahana mampandroso ny firenena marina. Miantso ireo tompon’andraikitra isan-tsokajiny mba hanaja izay fahamarinana izay araka izany ity raiamandreny am-panahy iray ity.
Pati
Legende : Tsara raha mijoro amin’ny fahamarinana mandrakariva ny tompon’andraikitra hoy Pastera Heritiana !