Fanohanan’ny depiote Todisoa ny tanora

Partagé sur :
• facebook

Mpianatra teny anglisy miisa 89 miandahy no navoakan’ny Fikambanana Ny Andraina ny sabotsy lasa teo teny Ambatolampy Antehiroka.

Nahavita fiofanana nandritra ny 9 volana izy ireo, ka notolorana mari-piofanana. Antony nandrisika azy ireo hanaraka io fiofanana io ny fahatsapana fa ilaina amin’ny sehatra rehetra na amin’ny fanohizana fianarana na ny tontolon’ny asa ny teny Anglisy. Ny fahatsapana fa tena ilaina ny teny vahiny, kanefa maro no tsy manana fahafahana hanaraka fiofanana izany no nandrisika Ny Fikambanana Ny Andraina nanofana maimaimpoana ho an’ireo tanora. Ray mpiahy azy ireo ny depiote Todisoa Andriamampandry, izay naneho fa maimaimpoana tanteraka ny fampiofanana sy « polycops » nampiasaina tamin’izany, ary mpampianatra matihanina no nizara ny fahaiza-manao tamin’ireo mpiofana tsy nanavahana saranga. « Tsy nanavahana antokom-pinoana na antokom-pivavahana na loko politika fa rehefa zanak’Ambohimanarina na iza na iza dia nomena izay fahafahana miofana amin’ny teny Anglisy izay satria fantantsika fa tena manana ny lanjany eran’izao tontolo izao ny teny Anglisy, ary na ho aiza ianao na ho aiza, raha hiditra amin’ny sehatry ny hiasa dia ilaina. Raha hiofana amin’ireny Ivon-toerana sy sekoly maro samihafa ireny anefa dia volabe, tsy zakan’ny Raiamandreny ety amin’ny Faritra iadidiako, ka izay no nahatonga anay sy ny fikambanana Ny Andraina nanome anjara biriky nanofanana maimaimpoana ny teny Anglisy, ary efa nanomboka iray volana eo ihany koa ny fanofanana momba ny teny Alema izay maimaimpoana hatrany ho an’ny zanak’Ambohimanarina », hoy ny depiote Todisoa Andriamampandry. Tanjona ny hahaizan’ny zanak’Ambohimanarina, tsy hohabadoin’ny olona, fa mba ho mpitarika na eto an-toerana na any ivelany mba ho reharehan’ny taranaka Malagasy, hoy io olom-boafidy io namarana ny teniny.
Toky R
 

Tia Tanindrazana

Samia mijoro ho an'i Gasikara.