Politique

Fampanjakana tany tan-dalàna, fihavanana… Resaka fotsiny ny an’ny fitondrana

Politique
Zoma 24 Martsa 2023

Noporofoin’ny fitondrana ankehitriny sy nasehony tamin’ny fomba niharihary indrindra nanomboka ny alin’ny 22 martsa 2023 teo,

izay fotoana namoahana ny didim-panjakana manatsahatra ireo mpikambana eo anivon’ny Filankevitra ambony momba ny demokrasia sy tany tan-dalana na HCDDED tamin’ny asany fa resaka fotsiny ny an’izao fitondrana izao izany fampanjakana ny demokrasia sy tany tan-dalana izany satria dia vitany ny nanapaka an-tenantenany ny fotoam-piasan’izany rafitra izany nefa mbola tsy tokony hifarana akory. Izany resaka fihavanana sy fampihavanam-pirenena izany moa dia tao anatin’izay 4 taona izay no niaraha-nahita ny tsy fahavononan’ny fitondrana ankehitriny hiroso aminy. Raha nisy fitsikerana betsaka indrindra heno mikasika izany Filankevitry ny fampihavanana malagasy na CFM izany dia saika avy amin’ny fanohanana ny fitondrana hatrany. Nifarana am-bolana maro moa izay ny fotoam-piasan’io rafitra io saingy mbola baraingo hatreto ny mety ho tohiny. Ankoatran’ny fanenjehana ireo heverina ho fahavalo politika sy mpanelingelina izao fitondrana izao tahaka an-dry Malama, Mbola Rajaonah, Berija sy ny tariny dia ireny niaraha-nahita ireny koa ny nahazo ireo vehivavy TIM nikasa hanamarika ny 8 martsa. Toy izany koa ny nahazo ireo depiote nitarika hetsika teny Itaosy teny. Tontolo iainana politika toy izany ve no heritreretin’izao fitondrana izao hitondra fampandrosoana ?
J. Mirija