Famoriam-bahoaka ankalamanjana

“Amin’ny fanombohan’ny fampielezan-kevitra vao halalaka”

Politique
Zoma 01 Septambra 2023

Nilaza omaly ny Minisitry ny Atitany Atoa Tokely Justin, fa malalaka ny fanehoan-kevitra na ho an’ny mpanao politika na ny antoka,

ka nilazany fa afaka manao hetsika avokoa. Amin’ny fisokafan’ny fampielezan-kevitra amin’ny 10 oktobra kosa anefa vao halalaka ny fanaovana hetsika ankalamanjana. Nambarany fa mbola mila tandrovina ny filaminam-bahoaka, ka mbola mipetraka ny fepetra tsy fahafahana mamory vahoaka ara-politika ankalamanjana, araka ny naoty efa navoakan’io Minisitera io. “Manaja fepetra aloha mandra-pahatongan’ny fampielezan-kevitra. Rehefa tonga ny fotoanan’ny fampielezan-kevitra izay manomboka amin’ny 10 oktobra dia malalaka ohatran’ireny fampielezan-kevitra rehetra ireny ireo antoko politika sy mpanao politika. Mbola “pré-campagne” izao ka tsy maintsy mbola jerena tsara ny resaka filaminam-bahoaka. Amin’izao mba hitandrovantsika ny filaminana, dia tsy maintsy mbola raisintsika izay fepetra izay”, hoy ity Minisitra ity. Efa nanomboka ny 04 aprily moa no nandraisana io naoty io, saingy tsy mihatra amin’ny mpitondra Fanjakana, na dia misy hatrany aza ny fanambarana politika ataon’ny fitondrana ankehitriny. Ny hafa fehezina fa ny mpitondra efa tena miharihary ny endrika propagandy mialohan’ny fotoana.
Toky R