Dr Robinson Jean Louis

Partagé sur :
• facebook

Eo am-piandrasana ny voka-pifidianana ofisialin’ny filohan’ny Repoblika vaovao hitantana ny firenena Malagasy mandritra ny 5 taona, dia nanambara ny kandida Robinson Jean Louis fa tsy maintsy hiroso amin’ny fanadihadiana ireo andrim-panjakana rehetra nandritra ny tetezamita ny tenany mialoha ny hiakarany eo amin’ny fitondrana.

Antony iray hanaovana azy io ny fanatanterahana ara-bakiteny ny fitantanana mangarahara izay nanjavozavo ihany tao anatin’izay efa-taona mahery izay, fa indrindra indrindra hamerenana ny fifampitokisana amin’ny vahoaka sy ireo mpiara-miombon’antoka ara-bola amin’i Madagasikara. Nanamarika Atoa Razafimihary Mejamirado, mpanolotsainan’ny kandida fa fitsarana mahaleotena no hiandraikitra ny asa amin’izany. Hanafoana tanteraka ny fifanenjehana ara-politika izay miverimberina hatrany io fanapahan-kevitra noraisina io. Hampiantso ireo mpiantsehatra sosialy sy ara-toekarena ho famondronan-kery hanarenana ny firenena avy hatrany no dingana manaraka aorian’io, hoy ny fanampim-panazavana. Hisy ny fandrafetana fifanaraham-piaraha-monina amin’ny lafiny rehetra hamatotra ny fanjakana sy ireo hery velona ireo mba hialàna amin’ireo fitakiana tsy ho tanteraka. Ny tanjona lehibe ho an’ny ankolafy miara-dia amin’ny kandida Robinson Jean Louis dia ny fiarovana ireo harem-pirenena sy ny fomba hitrandrahana izany mba hifanaraka amin’ny tombontsoa iombonana. Tsy afaka ny hitoka-monina i Madagasikara, hoy Atoa Razafimihary Mejamirado manoloana ny fanatontoloana saingy ny fiaraha-miasa rehetra dia tsy maintsy baikon’ny tolotra sy ny tinady ary tsy hisy firenena vahiny ahazo tombony manokana.

Ramano F.

Tia Tanindrazana

Samia mijoro ho an'i Gasikara.