DISTRIKAN’ANTANANARIVO AVARADRANO

Vonona hampandroso ny faritra misy azy ny Ben’ny tanana

Politique
Alatsinainy 15 Aprily 2024

Tontosa ny faran’ny herinandro teo teny amin'ny Kaominina Ambohitrabiby ny fivoriana fanao

isaky ny roa volana ho an'ireo Ben'ny Tanana ao anatin’ny distrikan’Antananarivo Avaradrano. Ankoatra ireo tatitra mahakasika ny asa vitan'ny Ben'ny Tanana tsirairay sy ny fanamarihana isan-karazany mahazatra dia noresahina manokana ny mahakasika ny Komity Loharano, ny karnem-pokontany misy "QR Code", ny tetikasan'ny fitondram-panjakana ao amin'ny distrika, ny tsara ho fantatra momba ny fifidianana solombavambahoaka izay hotanterahina ny 29 May ho avy io ary ny "RALE 2024" na ny Fanavaozana isan-taona ny lisitry ny mpifidy. Ny Lehiben'ny Distrika Antananarivo Avaradrano no nitarika ny fivoriana ary nahatonga solontena avokoa ireo rantsa mangaika avy amin'ireo solontem-panjakana sy ny olom-boafidy ary ireo olom-boatendry, ny avy amin'ny mpitandron'ny filaminana, ny fahasalamana ary ny fampianarana. Niarahaba manokana ny Sefo Distrika Ramiandrisoa Mahefandrainibe Haritiana ireo Ben'ny tanana noho izy voatendry hiasa indray eto amin'ny Distrikan’ Antananarivo Avaradrano. Fanamby napetrak’ireo Ben’ny tanana rehetra moa ny mba hahafahana mampandroso hatrany ny faritra misy azy ho tombontsoan’ny vahoaka eny ifotony.
Pati
Legende : Tsy mitovy loko politika ireto Ben’ny tanana ireo saingy samy vonona ny hampandroso !