Politique

Difotry ny adim-piainana Tsy dia fantatry ny olona ny Tolom-panafahana 1947

Politique
Zoma 30 Martsa 2018

Tsy dia fantatry ny olona loatra amin’ny ankapobeny, indrindra fa ny tanora ny tantara fonosin’ny datin’ny 29 martsa 1947, izay notsaroana omaly, nisian’ny tolom-panafahana namoizan’ireo Malagasy maro ny ainy mihitsy, mba hiverenan’ny fahaleovantena.

Saika nilaza vaovao momba an’ity tolom-panafahana 1947 ity avokoa ny haino aman-jery, saingy betsaka ireo nivarotra toy ny hita tetsy Mahamasina izay nahavory mpiantsena maro tokoa. Toraka izany koa ny teny Isotry, Andravoahangy, Behoririka…. Vokatry ny adim-piainana no antony, araka ny fanadihadiana natao. Ho an’ireto tanora sendra ny gazety Tia tanindrazana ireto, ohatra, dia mahalala ihany izy ireo saingy ny fitadiavam-bola no halaharam-pahamehana.

Annouska, tanora 21 taona : “Fotoana nisian’ny Tolom-panafahana ny datin’ny 29 martsa. Efa fahatsiarovana sisa ilay izy noho ny hasarotan’ny fiainana. Variana any amin’ny fitadiavana avokoa ny olon-drehetra”.

Ony, tanora 18 taona : “Ny tena tsaroako izao ny nisian’ireo razambentsika namoy ny ainy niady ho an’ny fahaleovantenan’i Madagasikara. Ny mampalahelo anefa, tsy mbola tena mahaleotena isika e ! mbola miankin-doha amin’ny hafa foana”.

Nangonin’i Pati