Politique

Depiote lany henatra amin’ny kolikoly Mihevitra ny vahoaka ho dondrona

Politique
Alatsinainy 09 Aprily 2018

Sesilany ny fanadiovan-tenan’ny depioten’ny fitondrana manoloana ny fipariahan’ny horonantsary malaza ho nandritra ny fanaovana kolikoly tamin’ny fampandaniana ny lalàna mifehy ny fifidianana.

Ao ny milaza fa efa tamin’ny taona 2016 ireny. Ao ny miteny fa nandritra ny fizarana solika ho an’ny depiote. Tsy misy mpiasam-panjakana mizara vola amin’ny “chambre” izany, ary raha resaka solika izany dia manana ny atao hoe “carte magnétique” ny depiote amin’ny fakana izany. Raha hiverenana ny asan’ny solombavambahoaka, dia mpanao lalàna ary tokony izy ireo no fatra-panara-dalàna sy ho fitaratra amin’ny fitondran-tena, saingy ireny niaraha-mahita ireny ny sarimihetsika mamohehitra tsy mendrika amin’ny maha olom-boafidy. Mihevitra ny Malagasy ho dondrona sy kentrina, ka mbola miezaka manadio tena eo anatrehan’ny efa fihetsika nivoaka ho hitam-poko hitam-pirenena fa tsy manjary. Ezahina voizina sy ialokalofana amin’izao fotoana izao ny hoe tsy mbola azo raisina ho porofo eny amin’ny fitsarana ny resaka horonam-peo sy horonantsary eto amintsika. Sanatria ve ka ho vitavita ho azy ity resaka kolikoly sy fihetsika mamoafady manala baraka ny andrim-panjakana Malagasy ity ?

Toky R