CENI-T

Partagé sur :
• facebook

Tena nanantena ny fahombiazana sy fangaraharana teo amin’ny fomba fiasan’ny Vaomieram-pirenena misahana ny fifidianana mahaleotena ny olom-pirenena, hoy ny SeFAFi.

Tsy izay anefa no niseho fa sady ratsy fanomanana ny fifidianana no tsy vita ny fampiofanana ireo mpiantsehatra amin’ny fiatrehana ny fandatsaham-bato. Tsy tenenina intsony ny fiankinan-doha amin’ireo mpamatsy vola sy ireo mpitondra fanjakana ankehitriny, hany ka betsaka ireo miandrandra haingana ny fiafaran’ny fe-potoana hiasan’ny CENI-T miaraka amin’ny tetezamita. Azo asongadina ny tsy fahatomombanana teo amin’ny lisi-pifidianana. Nisy ireo olom-pirenena no tsy nanana kara-pifidianana nefa voasoratra mazava tao anaty lisitra na ny mifanohitra amin’izay. Nisy ireo voasoratra in-droa miaraka amin’ny kara-pifidianana roa, mpikambana ao amin’ny fianakaviana iray manontolo no tsy tafiditra ao anaty lisitra mihitsy, maro ireo kara-pifidianana tsy voazara. Ireo fahadisoana ireo dia hita teto an-drenivohitra sy ny manodidina ka azo visavisaina amin’izay ny zava-nitranga tany amin’ireo toerana lavitra maro eto amin’ny nosy. Tsy tokony hisalalasala intsony ny fanadihadiana sy ny fanatsarana ny lisi-pifidianana nasionaly izay efa voalamina ao anaty solosaina amin’ireo fandatsaham-bato manaraka rehetra miandry ny olom-pirenena.

Azo atao ihany koa ny mitily ireo lesoka sy ireo andraikitra tsy tontosa. Afaka nifidy ihany ireo olom-pirenena izay voasoatra tao anaty lisi-pifidianana nefa tsy nahazo kara-pifidianana rehefa nitondra kara-panondrom-pirenena izay toa milaza fa tsy misy lanjany ny kara-pifidianana ka manoro hevitra ny SeFaFi ny hitodihana amin’ny famokarana kara-panondro biometrika izay azo itokisana kokoa. Tena taraiky be ny fanentanana izay nivangongo fotsiny tamin’ireo tanàn-dehibe ary hita ho tsy nahomby ilay fomba fiasa fampiofanana miparitaka tsikelikely. Tsy nomen-danja ireo sehatra afaka nanampy betsaka tamin’ny fanentanana ireo olom-pirenena toy ireo sekoly sy ireo fiangonana. Niadana loatra ny fizotry ny fanisam-bato noho ny tsy fahampian’ny fitaovana ka nampitombo ny ahiahin’ny olom-pirenena. Momba ny safidin’ny andro zoma hanatontosana ny fifidianana indray dia fatiantoka ho an’ny ara-toekarena izany satria very andro iray sy tapany ireo orinasa ary eo amin’ny lafiny fifidianana kosa dia maro ireo tsy manefa ny adidiny amin’ireo olom-pirenena noho izy ireo misafidy ny hisintaka ny toerana mahazatra. Mety kokoa ny andro sabotsy, hoy ny SeFaFi.

Ramano F.

Tia Tanindrazana

Samia mijoro ho an'i Gasikara.