Antananarivo

Partagé sur :
• facebook

Talohan’ny fifidianana no efa nisy kandida teto Antananarivo nilaza fa efa misy bileta voamarika sahady,

tao no efa nanao ampamoaka fa misy fitaomana mpifidy ivelan’Antananarivo sy tsikombakomba amin’ny resaka « ordonnance », tao ny nitaky hatry ny ela ny hamoahana ofisialy ny lisi-pifidianana na ny kandida mivantana na tamin’ny alalan’ireo mpahay lalàna, saingy niniana tsy nohenoina sy nolazaina fa mpanakorontana. Dia ireny vaky ambatolampy ireny ny teti-dratsy sy kitoatoa samihafa. Nisy ny bileta nanjavona, toy ny teny Talatamaty, tao ny kara-pifidianana sy karapanondro tsy mifanaraka, nisy fahatrarana bileta efa voamarika toy ny teny Ambohitsoa, izay lehilahy 3 no voasambotra. Tovolahy maromaro no nitondra bileta efa voamarika teny Ambohitsoa fa tafatsoaka ny sasany fa ny iray tovolahy no tratry ny andrimasom-pokonolona. Efa nataon’ny vadintany na « huissier » ny fitanana an-tsoratra na « PV » dia nentin’ny polisy nandeha ka asa na notazonina na navotsotra ? Taorian’io, dia nisy 2 hafa fanampiny indray tratra, teny an-toerana ihany. Andiana zatovo maromaro ireo no niaraka, ary ny loharanom-baovao teny an-toerana no nahalalana nialohan’ny fahatrarana an’ity iray ity, fa maherin’ny 20 no niaraka, filohan’ny fikambanan’ny mpianatra avy amin’ny faritra no niaraka, depiote iray no mpaniraka,… Lehilahy iray nitondra kara-pifidianana miisa 2 ihany koa no niteraka savorovoro teny amin'ny EPP Ambohipo. Am-polony izy ireo saingy tafaporitsaka ny namany, raha ny filazan'ireo olona tena an-toerana. Nampisahotaka ny olona ny fahitana lakoly tamin'ny ankiben'ny tanany ankavia, izay afaka esorina. Rehefa nanontaniana ity lehilahy ity dia nilaza fa an'ny zandriny Ilay kara-pifidianana iray, saingy voatondrany avokoa rehefa andeha hifidy izy. Nentin'ny mpitandro ny filaminana ity farany, ho atao fanadihadiana. Nisy ihany koa ny sakoroka teny Anosibe, ary nisy olona voasambotra niaraka tamin’ny kara-pifidianana maro be sy bileta tokana. Misy ny mody miady nentina nambolena sakoroka, dia misy ny olona manao iraka na « mission » mampiditra bileta tokana efa vita marika mialoha, raha ny fanamarihana. Ireny no tratra fa ahiana ho mahafaobe na « généralisé» ny tranga toy ity teto Antananarivo. Mampanahy hoe : ahoana no hahatongavan’ny bileta tokana any am-pelantanan’ny mpanao politika na andian’olona voakarama ? Tsy tsara aro ve ? Nisy nangalatra ve ? Sa kosa tsikombakomba avo lenta ? Ampahany tamin’ny tranga io, fa betsaka ireo toerana nanerana ny nosy nahitana sy nahenoana tranga hafahafa tahaka izao.
Toky R

Tia Tanindrazana

Samia mijoro ho an'i Gasikara.