Anabavin-drajoelina kandida

Partagé sur :
• facebook

Dosiem-pifidianana isan’ny miteraka resabe amin’izao fotoana izao ny an-dRtoa Voahirana Rajoelina.

Nilaza ho tsy mahatapak'ahitra sy tsy manana ny fahefana manoloana ny fangatahana fanafoanana ny fiatsahan-kofidiany ny CENI. Zokin'ny Filoha Andry Rajoelina moa i Voahirana Rajoelina ary kandida depiote ao amin'ny boriboritany faha-6 Antananarivo renivohitra. Kandida mahaleo tena amin’ny anaran’ny Shine and Rise ny tenany fa tsy amin’ny anaran’ny IRMAR. Tsy fantatra mazava ny anton’ny fangatahana fanafoanana ny firotsahany, fa ny tsikaritra tsy mba re siosio ny firotsahan’ity anabavin’ny Filoha ity, fa efa mivoaka ity hoe: CENI tsy mahatapaka ity vao hoe: hay kandida ny tenany? Raha ny fahafantarana azy rahateo dia lisitra 4 no fantatra ofisialy fa nanatitra dosie tao amin’ny OVEC dia ny Firaisankina tarihin’ny Depioite Todisoa Andriamampandry, ny Kolekitifa tarihin-dRtoa Tania Avanamiarantsoa, ny IRD lisitra tarihin-dRtoa Tantely Razanamandimbisoa, ary ny tsy miankina tarihin’Atoa Jean de Dieu Rakotonirina. Nangingina ve ny fanaterana ny dosie ho an-dRtoa Voahirana Rajoelina? Inona no anton’ny fangatahana fanafoanana? Noho ny fahatarana ve sa antony hafa mihitsy satria tsy voalaza ofisialy? Inona no antony tsy nahafahan’ny CENI nanapa-kevitra sy nilaza ho angady tsy mahatapak’ahitra? Matoa aloha misy fangatahana fanafoana dia misy zavatra tsy milamina. Tena tsy fahefan’ny CENI sa noho ilay olona anabavin’ny Filoham-pirenena? Raha miverina amin’ny fanapahan-kevitr’io rafitra io anefa dia nahatratra 17 be izao ireo kandida tonga neken’ny CENI ny fanapahan-kevitry ny OVEC nitsipaka ny firotsahan’izy ireo. Andrasana ny tohin’ity raharaha ity!
Toky R
 

Tia Tanindrazana

Samia mijoro ho an'i Gasikara.