Akany Lovasoa 67 Ha

Nisitraka fanampiana avy amin’ny « Espoir de l’Océan Indien »

Politique
Alarobia 27 Desambra 2023

Toy ny efa fanaony dia tsy mitsahatra mahatsiaro ireo ankizy tezaina

eny amin’ireo Akany natsangan-dRamatoa Céline Ratsiraka ny avy amin’ny antoko Arema sy ireo mpiara-miasa aminy. Ny zoma 22 desambra teo dia ny Akany Lovasoa 67 Ha no nahazo ny anjara fanomezany izay niarahan’ny antoko niasa tamin’ny « Association Espoir de l’Océan Indien ». Notolorana akanjo sy kilalao ary vatomamy ireo ankizy tezaina sy beazina ao. Nahazo anjara fanomezana ihany ko any Ray aman-dRenin’izy ireo. Notohizana tamin’ny fiaraha-misakafo ny lanonana. Nanamafy moa Ramatoa Raharimalala Afrose Dorine, filohan’ity fikambanana « Association Espoir de l’ocean Indien » ity fa noho ny fahatsapana ny olana sedrain’ny ray aman-dreny eto Madagasikara amin’ny fampifalifaliana ny zanany rehefa fotoan’ny fety tahaka izao no anton’ny fanampiana. Akany sy fikambanana maro no efa nitondrana fanampiana tahaka izao ary mbola hitohy izany, hoy izy. Nisy ihany koa ny toromarika nomeny ireo ray aman-dreny amin’ny fomba fitaizana zaza.
Nangonin’i Toky R