Politique

Partagé sur :
• facebook

Tao anatin’ny 16 volana (jona 2010 – oktobra 2011) nitondran’ny PDS Rakotovao Mariot ny Kaominina, dia efa in-telo nitrangana fitokonana goavana i Toamasina I.

Teo ny fitokonan’ny “jockers” na mpitarika posy izay niafara tamin’ny fanimbana sy fandrobana tao Toamasina, teo koa ny fitokonan’ny mpiasa an-tselika nitety tanàna nitondra sorabaventy ary ity fitokonamben’ny mpiasan’ny Kaominina ity noho ny fitoriana misesy nataon’ny PDS ireo mpiasa eo anivon’ny Bianco. Omaly dia nisy indray ny famoahan’ireo mpiasa fitakiana faobe niarahana. Miisa 12 io fitakiana io, anisan’izany ny “fanomezan-toky tsy tanteraka…; mifanesy ny fivoahana tany ivelany nefa tsy misy vokany, ny efa vitan’ny Ben’ny tanàna teo aloha avokoa no mandeha ankehitriny; fanafoanana ny zon’ny mpiasa …”. Nambaran’ireto mpiasa mitokona ireto koa fa betsaka ny vola navoaka sy fanampiana azo tsy fantatra nanaovana azy.

“Mbola nomenay mpiasa 16 volana ny PDS Rakotovao Mariot nandinihany tena, na 03 volana aza no nolazainy ny jona 2010. Tonga ny fotoana nitsarana ny asany, ka tokony hiala moramora amin’izay izy fa potika ny tanànan’i Toamasina”, hoy hatrany ireto mpiasa. Tsy mbola ato ho ato raha izao no hivaha ny olana, na teo aza ny ezaky ny lefitra faharoan’ny PDS Ricky Dinh Van, niezaka hitady vahaolana tamin’ny mpiasa, izay niafara tamin’ny fanidin’ireo mpiasa azy tao anaty birao sy horakoraka fandrabiana ny alarobia tolakandro teo.

Rakoutou

Tia Tanindrazana

Samia mijoro ho an'i Gasikara.