Fandriampahalemana

Zava-mahadomelina Tsy ampy taona ny 75 %-n’ireo mpidoroka

Fandriampahalemana
Alatsinainy 31 Jolay 2017

Mihamitombo isa hatrany ireo olona mandray sy mihinana zava-mahadomelina eto amintsika. Ireo ankizy tsy ampy taona 14 ka hatramin’ny 18 taona no tena maro an’isa.

Mahatratra hatrany amin’ny 75 % izy ireo no tonga manatona ny toeram-pitsaboana misahana ireo olona manana olana amin’ny zava-mahadomelina sy ireo te-hiala aminy etsy Andravoahangy ( CCAA). Mihoatra ny 65 % kosa ireo manana olana amin’ny alikaola izay manodidina ny 40 hatramin’ny 50 taona raha vehivavy ny ankamaroan’ireo te-hiala sigara ary manodidina ny 40 taona ihany koa. Ny 85 %-n’izy ireo ihany no mahatody ny fitsaboana hatramin’ny farany ary tavafoaka, hoy ny dokotera Andriamiarinarivo Miarintsoa, lehiben’ny tobim-pitsaboana. Antony dia misy amin’izy ireo no teren’ny orinasany na ny fianakaviany mba hiala amin’izany fotsiny fa tsy vokatry ny fony akory. Tsy lafo anefa ny fitsaboana sady tsy sarotra. Diovina ny vatan’ilay marary ary tohanana ara-tsaina izy aorian’izay mba tena ho resy lahatra tanteraka fa ratsy ny fidorohana zava-mahadomelina. Marihina moa fa tena manomboka mahazo vahana eto amintsika ny fiparitahan’ny zava-mahadomelina amin’izao fotoana izao. Rongony 500 kg no tratran’ny mpitandro ny filaminana teto an-drenivohitra tato anatin’ny roa volana.

Pati