Fandriampahalemana

Zandarimariam-pirenena Tsy misy indrafo ho an’ireo mpandika lalàna

Fandriampahalemana
Alatsinainy 01 Jolay 2019

“Tandroka aron`ny vozona ny zandary ary natao hiaro ny vahoaka sy ny fananany fa tsy tokony hiray tsikombakomba amin`ireo jiolahy”, hoy ny sekreteram-panjakana miadidy ny zandarimariam-pirenena, Jly Richard Ravalomanana.

Zandary 41 no efa naiditra am-ponja tao anatin`ny enim-bolana ary tsy nisy nanagadra olona be dia be raha tsy izahay ato amin`ny zandarimariam-pirenena, hoy ihany izy. Tsy misy ny indrafo amin`ireo izay minia handika sy manitsaka ny lalàna mifehy ny zandarimariam-pirenena. Mbola hitohy hatrany io fanadiovana io ary tsy mifidy laharam-boninahitra fa izay mihoa-pefy dia tsy maintsy hampiharina aminy ny lalàna. Notsipihany fa tsy natao hangalana dera ny maha zandary fa natao andraikitra fotsiny. Izany no fanambarana nataon`ity sekreteram-panjakana miadidy ny zandarimariam-pirenena ity nandritra ny lanonana fampiakarana galona ireo manambonihaitra miisa 17 teny amin`ny toby Ratsimandrava ny sabotsy lasa teo. Niankina tamin`ny fitondran-tena sy ny asa vitan`izy ireo no masontsivana nofantenana ireo zandary ireo.

Marigny A.