Fandriampahalemana

Zandarimariam-pirenena Henjana ny fanadiovana

Fandriampahalemana
Alakamisy 29 Jona 2017

Zandary miisa 2 teto amin’ny faritra Analamanga no noroahina vokatry ny tsy fanarahan-dalàna tao anatin'ny 6 volana voalohan'ity taona 2017 ity.

Efa misy ihany koa ny famotorana momba ireo zandary miisa 35 eo ho eo voasaringotra tamina kolikoly sy resaka fitakiana vola tany amin’ny faritra Bongolava toa an’i Tsiroanomandidy. Tsy ho ela ny fandefasana ny antontan-taratasy any amin’ny ambaratongam-pitsarana momba ity raharaha ity aorian'ny fahavitan'ny famotorana tanteraka, araka ny fanambaran'ny lehiben'ny fari-piadiadin’ny zandarimaria Antananarivo na CIRGN ny jeneraly Andrianjanaka Njatoarisoa omaly. Manaratsy endrika ny zandary izany, ka efa nafindra toerana ireo zandary voarohirohy mandritra ny fanadihadiana azy. Nilaza ihany koa ny lehiben’ny CIRGN fa nahitam-bokany ny fampiatoana ny fisavan’ny zandary eny amin’ny lalam-pirenena (PR) ary zava-dehibe ny fihenan’ny fahafam-barakan’ny zandary, hoy ity tompon’andraikitra ity. Ao anatin’ny fandinihana izy ireo amin’ny fanohizana ny PR, saingy mbola misy aloha izao ny fampiharana.

Toky R