Fandriampahalemana

Vono olona teny Sabotsy Namehana Nibaboka an-telefaonina ilay rangahy

Fandriampahalemana
Alakamisy 09 Novambra 2017

Taorian’ny fanadihadiana nataon’ireo mpitandro ny filaminana sy ny Ben’ny tanànan’i Sabotsy Namehana Avotra Andriamosa mikasika ilay vono olona nitranga tao amin’ny fokontany Soatsilefy ny fiandohan’ny

herinandro teo ka nahafatesana renim-pianakaviana iray vao 28 taona monja dia fantatra omaly fa ny vadiny ihany no namono azy. Tamin’ny alalan’ny SMS an-telefaonina nalefany tamin’ny naman’i tompokovavy no nilazany fa novonoiny tao an-tranony ny vadiny, araka ny fanazavana voaray.

Efa vita ny “autopsie” ary voaporofo fa tena maty nokendaina ilay renim-pianakaviana. Efa niroso tamin’ny fisavana ny tokantranon’izy ireo ny mpitandro ny filaminana taorian’izay hahitana ny mombamomba ilay rangahy saingy tsy nahita na inona na inona. Somary olana kely ho azy ireo ny fitadiavana ilay nahavanon-doza raha ny fanazavan’ny komanda eo anivon’ny borigadin’ny zandarimariam-pirenena ao Sabotsy Namehana. Niaraka tamin-janany vavikely dimy na enin-taona rahateo ity raim-pianakaviana ity no izao lasa nitsoaka tsy hita popoka izao.

Pati