Fandriampahalemana

Tsy fandriampahalemana ao Antsalova Mpanolotsain’ny praiminisitra no ahiana ho ao ambadika

Fandriampahalemana
Zoma 16 Febroary 2018

Mitohy hatrany ny fitakian’ny vahoakan’Antsalova, faritr’i Melaky, ny famerenana ny adjida Patrice izay nikaomandy ny zandary niady tamin’ny tsy fandriampahalemana any an-toerana ary nafindra toerana tamin’ny volana oktobra, raha ny fanazavan’ny solombavambahoaka avy any an-toerana. 3 volana monja,

raha ny fanazavana, no nitarihan’ity adjida ity tafika tany an-toerana dia niisa 80 teo ireo dahalo voasambotra ary omby miisa 320 no tafaverina tamin’ny tompony. 3 herinandro monja taorian’ny nanalana azy anefa dia efa nisy trangana tsy fandriampahalemana teo amin’ny 26 isa teo sahady ary 300 izao ireo omby very. Olona miisa 4 ihany koa no maty hatramin’ny sabotsy teo. Manahy ireo vahoaka, raha ny fanazavana, fa misy olona ambony mahazo tombony amin’ny tsy fandriampahalemana eto amintsika ary antony naha mafy ny hetsika fitakiana ny fiverenan’ity adjida ity tany an-toerana ny 2 sy 3 janoary teo tany an-toerana. Efa heno, hoy hatrany ny depiote Maurice Ramarolahy, fa atahorana hikitikitika mpanolotsaina 1 ao Mahazoarivo ny fitoriana iray napetraka tamin’ny andron’ity adjida ity ka antony namindrana azy haingana io. Efa fantatra ihany koa fa alefa mankany amin’ny distrikan’i Miandrivazo fa tsy misy miakandrefana ireo omby halatra ireo, hoy izy. Na ireo tantsaha miasa tanimbary aza ankehitriny mijaly noho ny tsy fisiana omby, hoy hatrany ny fanazavana.

J. Mirija