Fandriampahalemana

Tsenan’Anosibe Avy any amin’ny « plafond » no miditra ireo mpangalatra

Fandriampahalemana
Alakamisy 19 Janoary 2023

Efa tsy azo hatao intsony ny mametraka vola ao an-tsena amin’ny alina amin’izao ao amin’ny tsenan’Anosibe.

Ankoatra ny haintrano ahiana hitranga mantsy dia efa avy any ambony plafond ihany koa amin’izao no miditra ireo mpangalatra. Mpivarotra maro no nahazoana fitarainana fa tapitra manjavona ny vola apetrak’izy ireo ao an-tsena amin’ny alina, indrindra fa ireo hasisika any ambony plafond. Nataon’ny mpiandry tsena araka izany ny vela-pandrika ka tovolahy iray no tratra niditra avy any ambony plafond ny Talata alina teo. Mbola tratra teny aminy nandritra izany ihany koa ny fitaovana entiny mandidy ny plafond. Raha araka ny fantatra moa dia efa fanaon’ity tovolahy ity ny tahaka izao. Mitily ireo mpivarotra ny asa hataony amin’ny andro ary mametraka paikady avy hatrany mikasika ireo tsena izay hoteteziny raha vantany vao hariva ny andro.
Nangonin’i Pati
(Sary nindramina)