Fandriampahalemana

Tratra i Zaka lava jiolahy raindahiny Mitaky fitsaram-bahoaka ireo nanaovany asa ratsy

Fandriampahalemana
Talata 28 Novambra 2017

Fanafihana ny lehiben’ny faritra teo aloha Ranaivonirina Jean Yves no nahafantarana an’i Zaka lava. Mpikambana amin’ny tambajotra jiolahy mahery vaika ao Ambatondrazaka ny lehilahy.

Ankoatra ny famonoana an’ilay mpiambina toeram-pivarotana iray ao Ambalabako tamin’iny herinandro iny dia fantatra fa efa namono olona tao amin’ny tsena Ambatondrazaka ihany koa izy. Nisy fotoana efa tonga teny amin’ny fitsarana izy no tafaporitsaka nandositra. Marihina fa vao 21 taona ny lehilahy kanefa efa jiolahy hikoizan’ny rehetra. Mampiasa fanamiana mpitandro ny filaminana ny tenany rehefa hanao ny asa ratsiny. Rehefa avy manao fanafihana ao Ambatondrazaka izy dia somary misintaka kely ny tanàna ka manorim-ponenana any Moramanga. Ry zareo avy eo anivon’ny polisim-pirenena no nanao ny fikarohana an’i Zaka lava taorian’ny fitarainana nataon’ny lehiben’ny faritra teo aloha. Ny faran’ny herinandro teo no sarona tany an-tranony ao Antsahalava izy.

Niry A