Fandriampahalemana

Partagé sur :
• facebook

Mafampana ny toe-draharaha any Betroka. Vaky ny ady eo amin’ireo samy mpanao politika ao an-toerana. Nisy nanitsoka ampahibemaso ny tenany, nandritra ny fivorian’ny tompon’andraikitry ny filaminana natrehin’ny lehiben’ny Faritra Anôsy fa ny solombavambahoaka Randrianasolo Jean Nicolas no ao ambadik’izao tsy fandriampahalemana, sy mamatsy fitaovam-piadiana ireo dahalo mamono olona amin’iny Distrika iny.

Niaka-pofona ity olom-boafidy akaiky ny fitondrana ity, ka nanondro avy hatrany ny Ben’ny tanànan’i Betroka teo aloha ho “mpanely tsaho sy mpanendrikendrika”.Milaza ny “tsy hipetra-potsiny” manoloana izany ny tenany, fa “hametraka fitoriana ary koa hanao tatitra isan’ambaratonga”. “Mitaky ny hamoahana porofo sy ny dosie mikasika izany fanasoketana azy izany” ihany koa ny Depiote Randrianasolo Nicolas. Etsy an-kilan’izay dia nodoran’ny mpitandro ny filaminana ny tanànan’Ambaro, fokontany Bema, kaominina Kelivaho ao amin’ity distrikan’i Betroka ity vokatry ny fampiharana ny dinan’i Mangoky amin’ny asan-dahalo. Vahoaka maro no traboina tsy manan-kialofana tsy manan-koraisina, ankoatra ireo nosamborina. Manamafy izany ilay mpanakanto malaza D’Gary, ity farany, izay tsy nanafina ny alahelony, nilaza fa “Antsakabary bis no mitranga”. “Manangona izay voatsirambin’ny tanana izahay izao, hanampiana ireo traboina ireo”, hoy izy manohy ny fanazavany sady miantso ny mpitondra handray andraikitra. 

Jean D.

Tia Tanindrazana

Samia mijoro ho an'i Gasikara.