Tovovavy 20 taona hita faty teny Tanjombato

« Tsy mpivaro-tena ny havanay, ahiana ho niniana novonoina »

Fandriampahalemana
Alarobia 28 Mey 2025

Nisehoan’ny zava-doza indray ny faritra Tanjombato, raha hita faty teny amin’ny Barrage

ilay tovovavy antsoina hoe RAZANAJOELINA Lydia, 20 taona, ny marainan’ny alatsinainy teo. Araka ny nambaran’ny fianakaviany, dia tsy fahafatesana tsotra no nahazo an’ity tanora ity fa famonoana olona niniana natao. Nilaza tamin-katezerana sy alahelo tanteraka ny fianakaviana fa tsy mpivaro-tena tahaka araka ny niely tamin’ny tsaho eny anivon’ny fiarahamonina sy tambajotran-tserahsera ilay zanak’izy ireo. “Zanaka nitrebona sy nanana hoaviny tsara i Lydia. Tsy mpivaro-tena izy. Tsy rariny ny fanasoketana ataon’ny olona amin’izao tranga mampalahelo izao,” hoy izy ireo. Araka ny fanazavana nomen’ny fianakaviana, dia niala tao an-trano ny alahady atoandro i Lydia ary nilaza fa hihaona amin’ny tovolahy sakaizany. Tsy tafaverina an-trano anefa izy. Niezaka niantso azy ny fianakaviany tamin’ny 7 ora hariva, saingy maty ny findainy. Ny ampitso vao nisy nahita ny vatany efa vata mangatsiaka teny amin’ny faritra ny « Barrage » teny Tanjombato. Miandry ny vokatry ny fanadihadiana sy ny fizahana avy amin’ny mpitandro filaminana ny fianakaviana amin’izao fotoana izao. Efa manomboka mandeha ny fanadihadiana amin’ny antony nahafaty sy ny olona farany niaraka taminy. Ahiana ho tratry ny famonoana niniana natao ity tovavy ity, raha ny fanamarihana.
Asminah Randriamanjara (Mpiana-draharaha)