Fandriampahalemana

Tompon’andraikitry ny zandary tsy nahomby Andrasana ny fanapahan-kevitry ny SEG

Fandriampahalemana
Talata 09 Janoary 2018

Notontosaina omaly tetsy amin’ny toby Ratsimandrava Andrefanambohijanahary omaly ny lanonambe fifampiarahabana nahatratra ny taona ho an’ny zandarimariam-pirenena.

Nilaza ny tomban’ezaky ny zava-bitan’ny zandary tamin’ny taon-dasa ny sekreteram-panjakana miadidy ny zandarimariam-pirenena (SEG), ny Jeneraly Girard Randriamahavalisoa, tao anatin’ny kabariny ary nanambara ny tsy fahafahampony. Mbola nirongatra ny tsy fandriampahalemana ary mbola misy ny kolikoly, hoy izy. Efa nanambara izy fa tsy maintsy hoesorina amin’ny toerany ireo tompon’andraikitra tsy nahomby nanerana ny faritra. Andrasana anio ny fanapahan-kevitra raha ny tokony ho izy. Anio no hisy ny tatitra ofisialy sy ny famoahana ny tarehimarika rehetra etsy amin’ny toby Ratsimandrava hatrany. Mikasika ireo fianakaviamben’ny zandary traboina any Toamasina kosa izay misy fianakaviana miisa 15 sy toeram-piasana 2 rava kosa dia efa misy ny fepetra raisina, raha ny fanazavana hatrany.

J. Mirija