Tarika Oladad

Nisy nangalatra teny amin’ny RN2 ny valizy

Fandriampahalemana
Alatsinainy 04 Novambra 2024

Ankoatra ny fidirana an-keriny anatina kamiao mandalo dia fantatra fa efa misy mpangalatra

entana ihany koa any amin’ny lalam-pirenena faharoa miazo an’i Toamasina amin’izao. Voakasik’izany ny entan’ny tarika Oladad izay nisy valizy miisa 4. Raha araka ny loharanom-baovao dia afak’omaly Sabotsy alina no nitrangan’izany raha handeha hiakatra teto an-drenivohitra izy ireo ary saika hanao live tetsy amin’ny Naturia Palm omaly Alahady 03 Novambra. Valizy miisa 6 no tao anaty labasy saingy 2 sisa no tavela rehefa novahana izany tokony ho tamin’ny 1 ora maraina, fotoana nahatongavan’izy ireo teto Antananarivo. Notatahan’ireo mpanao ratsy moa ilay labasy dia nalatsany moramora ny entana, paikady izay efa tena matihanina tokoa raha ny fanazavan’ny tarika. Tsy misy tohatra hahafahana miakatra anefa ilay fiara, fanontaniana izay mbola tena tsy nahitan’ny maro valiny. Mampitandrina ireo mpampiasa ny lalam-pirenena faharoa izy ireo noho izany mba samy ho mailo sy hitandrina tsara.
Pati
Legende : Resin’ny torimaso tahaka izao avokoa ny rehetra hany ka tsy nahita na nahare na inona na inona teny an-dalana !