Fandriampahalemana

Soalazaina - Ambatondrazaka 30 tapitrisa Ariary vao votsotra ilay takalon'aina

Fandriampahalemana
Alakamisy 27 Aogositra 2020

Navotsotr’ireo mpaka ankeriny omaly maraina ny tovolahy iray, 24 taona, nataon’izy ireo takalon’aina nanomboka ny alahady 23 aogositra teo.

Vola mitentina 30 tapitrisa Ariary no notakian’ireo mpaka ankeriny ho tambin’ny famotsorana ilay tovolahy. Voaloa avokoa ny vola, votsotra ity farany, efa tafaverina eo anivon’ny fianakaviany ary salama tsara. Zanaky ny lefitry ny Ben’ny tanàna Kaominina Soalazaina, Distrika Ambatondrazaka ilay tovolahy nataon’ny jiolahy takalon'aina. Teny an-dalana hamonjy ny toerana filasiana izy sy ny namany roalahy ny alahady 23 aogositra 2020 tokony ho tamin’ny 11 ora alina, rehefa avy nanaraka ny fanazavan’ny filoham-pirenena Andry Rajoelina mikasika ireo fepetra ara-pahasalamana ho an’ny 15 andro manaraka, no nosakanana efa-dahy. Ny roa tamin’ireo jiolahy naka sy nitondra azy avy hatrany, ny roa hafa niambina ireo roalahy naman’ilay tovolahy sady nanome ny laharana finday ahafahana mifandray sy miady varotra ny vola tambin’ny famotsorana ilay takalon’aina. Karohina fatratra ireo mpaka ankeriny ireo amin’izao.

Jean D.