Fandriampahalemana

Partagé sur :
• facebook

Lehilahy iray no tratra ambodiomby nisintona findaina vehivavy iray nandeha

taxibe teny amin’ny 67 ha ny 29 Novambra lasa teo. Mbola tazana teny amin’ilay mpangalatra teny am-pandosirana ilay finday miloko fotsy an’ilay vehivavy. Tsy lasa lavitra anefa izy dia tratra. Rehefa voasambotra anefa izy dia finday miloko mainty tsy mandeha no sady efa vaky ecran no navoakany ary nolazainy fa io ilay finday. Raha mbola teo am-panontaniana azy ny polisy dia tafatsoaka indray izy ary nenjehina ka voasambotry ny fokonolona. Niharan’ny fitsaram-bahoaka ny tovolahy nandritra izany ka naratra. Tamin’ny fanadihadihana natao taminy no nahalalana fa efa nigadra izy tamin’ny taona 2015, taorian’izay dia efa niasa saingy lasa nanao ity asa ratsy ity indray noho ny fahasahiranana. Niaiky ny heloka nataony izy ary nitantara ny fomba nakany ilay finday. Nambarany fa nijanona teo amin’ny toby fiantsonana ilay taxibe no efa hitany nilalao finday ilay vehivavy tao anatiny ka vao nandeha ny fiara dia notsambikinany nalainy izany. Rehefa nenjehina izy dia natolony olona tsy fantatra ilay finday. Rehefa tratra izy dia nentiny nandrebirebena ny Polisy hahafahany mandositra indray ilay finday miloko mainty. Tsy manana ny mpandray finday halatra izy raha araka ny fanazavany fa olona mandalo no fivarotany azy. Natolotra ny fampanoavana omaly ny lehilahy.

Pati

Legende : Nigadra noho ny fangalarana finday indray ity tovolahy ity

Tia Tanindrazana

Samia mijoro ho an'i Gasikara.