Ramidy mpikamban’ny CFM

Nisy namono tamin’ny fomba feno habibiana

Fandriampahalemana
Talata 12 Martsa 2024

Tsy milamina ny tany ! Maty nisy namono tamin’ny fomba feno

habibiana Ramidison Avonelina na Ramidy no ahalalan’ny maro azy, Mpikamban’ny Filankevitry ny fampihavanana Malagasy na CFM Amoron'i Mania. Tany anaty ala tao Tsarasaotra, Kaominina Ambanivohitra ao amin’ny Distrika Ambositra no nahitana ny vatana mangatsiakany. Feno ratra ny lohany sy ny tanany, raha ny tatitra avy any an-toerana, izay midika fa tsy fahafatesana voajanahary fa vono olona niniana natao. Mpikambana CFM Amoron'i Mania i Ramidy. Ankoatra ny naha mpikamban’ny CFM azy, dia Administratera sivily misotro ronono izy, Mpampianatra tao amin'ny INFA (Institut National de Formation Admnisitrative) sy ENAM (Ecole Nationale d’Administration de Madagascar) Androhibe teo aloha. Efa nitazona andraikitra maro teto amin'ny firenena sy ny Faritra Amoron'i Mania ihany. Nanokatra fanadihadiana ny Zandarimariam-pirenena hikarohana ny nahavanon-doza. Ranolava ny tsy fandriampahalemana saika manerana ny Nosy, hany ka hatramin’ny olona mpandamina fiarahamonina aza itony misy mamono amin’ny fomba feno habibiana.
Toky R