Fandriampahalemana

Partagé sur :
• facebook

Tsy mbola nahitam- bahaolana hatramin'izao ilay resaka omby an- jatony nalain'ny miaramila mpampandry tany tao amin'ny fokontany Maharihy ao Morombe sy nogiazany ao Antanimeva.

 Mahavalalanina ny maro anefa fa ireo miaramila naka ny omby ihany no mbola nametrahana andraikitra handamina ny raharaha miaraka amin'ny Dinabe fa nailika tanteraka ny zandary, polisy, atitany ary ny fitsarana. Nandalo teto  an- drenivohitra indray tamin’ny faran’ny herinandro teo, Atoa Mahatratsy Jean, mpitondra tenin'ny fianakavian'Atoa Jaonary ka nisaotra sy nankasitraka ny filoha izy naniraka ny praiminisitra sy ireo minisitra mpikambana ao amin'ny governemanta notarihany nidina ifotony tany an- toerana. Mijoro anefa ny tenany satria tsy tanteraka akory ny fihainoana azy ireo izay nampakaran'ny praiminisitra ireo voakasiky ny raharaha rehetra tany Toliara tamin'ny alakamisy lasa teo, ka mampisamboaravoara ny olana indray. Ho an'ny fianakavian'i Jaonary  dia tokony homena andraikitra handamina ny raharaha koa ny mpitandro filaminana mpisava bokin'omby. Mitaky ihany koa izy ireo ny hampiakarana ny raharaha eny anivon'ny fitsarana sy hampiharana ny tapaka ao anatin'ilay PV laharana 042 tamin'ny 15 aogositra 2019 izay efa eny anivon'ny fitsarana. Marihina fa mahazo fandrahonana sy terena  hamoaka an'Atoa Jaonary, tompon'ireo omby ny fianakaviana. Izy io anefa tsy hita izay misy azy ary tsy misy fifandraisana efa ho iray volana mahery izay. Farany dia nambaran’Atoa Mahatratsy Jean fa manam-paniriana ny hihaona mivantana amin'ny praiminisitra sy ireo minisitra isanisany voakasik'ity raharaha ity ireo solontenam-pianakaviana hitondra ny porofo sy ny fanazavana ny zava-nisy marina momba io raharaha io.

Ntsoavina Evariste

Tia Tanindrazana

Samia mijoro ho an'i Gasikara.