Fandriampahalemana

Raharaha fakana an-keriny Karohana i Bôly sy Sôla ary Olivia

Fandriampahalemana
Sabotsy 21 Oktobra 2017

Fantatra izao, noho ny fanadihadiana nataon’ny borigady misahana ny heloka bevava, fa i Fidimalala Rakotondrainibe (Bôly) dia miray tendro amin’i Pierre Joseph Rakotoarimanana

(Ram’s) izay samy ekipan’i Sôla, raindahany (chef de bande) amina raharaha fakana an-keriny. Raha tsiahivina, teny Anosy Avaratra no adiresy farany nahafantarana fa nisy an’i Ram’s sy Olivia na Olivia Jenny Raharinirina vadiny izay samy efa namoahana ombay mitady. Nandritra ny fidinan’ny BC teny an-toerana dia efa tafatsoaka izy mivady ary navelany tao ny zanany 3 mianadahy. Marihina fa na i Ram’s na i Sôla dia samy efa nisazy teny Tsiafahy avokoa. I Sôla dia efa nigadra tamin’ny naha voarohirohy azy tamina raharaha fakana an-keriny am-polony maro ka rehefa nidoboka teny Tsiafahy ny tapaky ny taona 2015 dia nivoaka ny fonja ny farany volana desambra 2015 ihany. Fantatra fa i Bôly izay anaovana ombay mitady dia miray tendro amin’i Ram’s ary dia azo heverina fa mety ho ambadika koa i Sôla izay samy efa karohin’ny mpitandro ny filaminana fatratra ankehitriny.

J. Mirija