Fandriampahalemana

Partagé sur :
• facebook

Olana iray mbola saro-bahana eto amintsika ny fandaminana ny posy sy ny sarety. Matetika miteraka fitohanana sy fanelingelenana amin`ny fifamoivozana izy ireny ka mahavelon-taraina ny maro.

Tsy tokony hahitana azy ireny intsony eto an-drenivohitra saingy noho ny tokantrano maro be mivelona amin`io asa io dia ho sarotra ny hanafoanana azy. “Inona no hohaninay ? Iza no hanome ny hofan-tranonay ? Sa hangalatra na hirenireny hangataka sy hatory eny amin`ny arabe izahay ?”, hoy i Noely mpitarika sarety etsy amin`ny faritra Ankazomanga. Fanatsarana no tokony hatao ary tsy mahakasika mihitsy ny vola miditra aminay izany. Inona no sakana tsy amahana ny olan`ny posy sy sarety amin`ny fifamoivoizana eto amintsika ? Tsotra ny famahana azy raha mahay miresaka sy mifandamina ny fanjakana sy ny kaominina. Ilaina ny lamina maty paika amin`ny ora fiasana sy ny lalan`ireny posy sy sarety ireny mba tsy hiteraka loza sy fitohanana. Eo ihany koa ny hamerana ny entana hoentin`izy ireny. Azo atao ihany koa ny fanaraha-maso sy ny fitsarana ny posy sy sarety ialana amin`ny loza sy ilay fijanonana afovoan`ny arabe rehefa vaky ny kodiarana na tapaka ny hazo izay mateti-pitranga. Maro ny fanatsarana azo atao, saingy sakana ny tsy fifankahazoan’ny fitondrana sy ny kaominina. Ezahina takonana mihitsy mantsy ny kaominina amin’izao fa henjehin-drafanjakana daholo ny asa ataony. Mila miova ny toe-tsaina raha te handroso  amin’ny fanatsarana ny tanàna ary mila tsinjovina hatrany ny sahirana fa tsy variana mifamingana.

Tsiry

Tia Tanindrazana

Samia mijoro ho an'i Gasikara.