PORT-BERGÉ - FARITRA SOFIA

Voasambotra ireo 17 lahy mpisoloky

Fandriampahalemana
Talata 11 Novambra 2025

ao amin'ny tambajotra Qnet

Ravan’ny Polisim-pirenena ao Port-Bergé ny tambajotram-pisolokiana QNET. Olona miisa 17 no voasambotra izay samy tafiditra amin’ity fikasan-dratsy ity. Tambajotra efa fantatra amin’ny asa fanambakàna sy fakàna vola amin’ny alalan’ny fidiram-bola sandoka izy ity, raha tsiahivina. Tamin’ny 28 oktobra teo raha tsiahivina dia olona 13 isa no tratra voalohany tao amin’ny fokontany Ankorovaka no tra-tehala raha mbola teo am-panatanterahana fanomanana ny teti-dratsin’izy ireo amin’ny fisolokiana. Nandritra ny famotorana dia fantatra fa ny mpikambana tsirairay avy dia mitaky 3 600 000 Ar amin’ny olona izay hampidirin’izy ireo anaty fikambanana, ka lazaina sy hampanantenaina ireo olona ireo fa hahazoana tombony izany vola izany amin’ny alalan’ny fanangonana mpikambana vaovao. Taorian’izany dia olona 04 tamin’ireo no natolotra ny Fitsarana PAC ao Mahajanga na ny tendrom-pitsaràna miady amin’ny kolikoly, ho fanohizana ny raharaha. Ny 03 novambra 2025 anefa dia tsikaritra fa niverina nihetsika indray io tambajotra QNET io tao amin'ny trano iray tao Mahasalama, Port-Bergé ihany. Nandray andraikitra haingana ny Polisim-pirenena ka olona 8 no voasambotra, ahitana mpitantana 3 sy mpikambana 5 izay efa voatonona tamin’ny raharaha teo aloha. Samy efa notanan’ny Polisim-pirenena avokoa ireo voarohirohy rehetra ireo mba hanohizana ny fanadihadiana.
Pati
Légende : Ry zalahy isany