Fandriampahalemana

Oniversiten’ i Fianarantsoa Tratra ireo lehilahy 2 nangalatra tablette sy solosaina

Fandriampahalemana
Talata 05 Mey 2020

Lehilahy miisa roa, 25 sy 37 taona no voasambotry ny polisy miasa ao Fianarantsoa noho ny resaka halatra.

Tonga nametraka fitoriana tao amin'ny biraon'ny polisy tao Fianarantsoa ny tompon'andraikitra tao amin'ny Oniversite an'Andrainjato Fianarantsoa nampilaza ny fahaverezana tablettes miisa 33 sy solosaina miisa 10. Araka ny voalazan'ity tompon'andraikitra ity dia vao tamin'ny voalohan'ny volana aprily teo vao tsikariny fa misy entana very tao amin'ny oniversite. Nanokatra fanadihadihana avy hatrany ny polisy vao naharay izany fitarainana izany. Rehefa natao ny fanadihadihana dia fantatra fa mpiambina miasa ao amin'ity oniversite ity ihany ireo jiolahy miisa roa nahavita izao asa ratsy izao. Niroso tamin'ny fisamborana ireo jiolahy avy hatrany ny polisy vao fantatra ny mombamomba azy ireo. Mbola hita tany amin'ireo jiolahy ny tablette miisa 14 sy ny solosaina miisa 05 ary efa naverina any amin'ny tompon'andraikitry ny oniversite. Niaiky ny fahadisoany izy roalahy ireto. Mbola mitohy ny fanadihadihana sy ny fikaroana ireo fitaovana sisa tsy mbola tafaverina. Natolotra ny fitsarana omaly izy roalahy.

Pati