Olona nampiahiahy

tao Tsinjoarivo

Fandriampahalemana
Talata 04 Aogositra 2026

Roalahy nosamborin'ny Zandary sy Fokonolona

Nisahotaka ny olona tao Tsinjoarivo Ambatolampy omaly rehefa naheno antso vonjy nataon'ny ankizy mpiandry omby fa hoe : misy manenjika izy ireo. Raikitra ny fanenjehana ireo olona nampiahiahy nataon'ny Fokonolona nampian'ny zandary. Roalahy no azo sambo-belona, naratra voatifitra teo amin'ny fe na izany aza ny iray. Nolanjaina namonjy tobim-pahasalamana tao Tsinjoarivo notsaboina vonjimaika ilay naratra nialoha ny nitondrana azy ireo nankany amin'ny tobin'ny zandary ao Antsampandrano, hanaovana famotorana azy ireo. Nahitana vola sy volamena tany amin'izy ireo. Ao ny milaza fa dahalo nanafika mpitrandraka volamena ireto tratra ireo, tao koa no niahiahy sao mba mpangalatr'olona. Ny fanadihadiana ataon'ny zandary anefa no tena hahafantarana ny nahatongavan'ireo olona ireo tany Tsinjoarivo.
Jean D.