Olona 2 natao « kidnapping » any Tsaratanana

Mitaky 140 tapitrisa Ar ireo jiolahy, very hevitra ny fianakaviana

Fandriampahalemana
Zoma 09 Febroary 2024

Nitrangana fakana an-keriny indray tany amin’ny Fokontany Ambolosy,

kaominina ambanivohitra Ambakireny, distrikan’i Tsaratanana ny Alahady alina lasa teo tokony ho tamin’ny 09 ora. Vehivavy roa samihafa saingy mpiray monina no lasibatra tamin’izany. Ho an’ilay Renim-pianakaviana iray vao 28 taona monja, manan-janaka mianadahy kely dia fantatra fa 60 tapitrisa Ar be izao no takian’ireo jiolahy amin’ny vady andefimandriny izay mitaraina sy manao antso avo fatratra ao amin’ny tambajotran-tserasera Facebook. 80 tapitrisa Ar kosa no takian’ireo jiolahy amin’ilay fianakaviana iray izay marihina fa samy tsy manan-katoraka avokoa. Mangataka ny Fitondram-panjakana mba hijery akaiky izao tranga izao moa ilay Raim-pianakaviana iray vadin’ilay Renim-pianakaviana vao 28 taona monja. Manahy mafy izy sao vonoin’ireo dahalo ny vadiny raha sanatria ka tsy hitany io lelavola io. Ny laharam-pinday 034 88 669 22 no hahazoana azy.
Pati
Legende: Ireto izy mivady !