Fandriampahalemana

Partagé sur :
• facebook

Nitrangana fanafihan-jiolahy mahery vaika tany amin’ny Fokontany Ambohitromby Antamponala ny 09 Aogositra lasa teo.

Mpirahalahy iraitampo no indray notafihin’ny dahalo 20 lahy  izay fantatra fa misy Antandroy sy Betsileo.  Samy mpivarotra mpambongady izy roalahy ireo ka ny iray no nisantarany izany asa ratsy izany. Novakiany ny varavarana raha araka ny tatitr’io Raim-pianakaviana io ka lasany tamin’izany ny vola mitentina 1.500.000 Ar. Toraka izany koa ny entam-barotra manodidina ny 7.500.000 Ar . Tsy nionona teo ireo dahalo ireo  fa nanafika ny tsenan’ilay rahalahiny indray taorian’izany ka itsy Raim-pianakaviana voalohany no nalainy an-keriny hamoahana ilay rahalahiny niampy ny kapoka famaky tamin’ny lohany sy ny zanany lahy iray izay tena naratra mafy tokoa. Tsy naharitra ilay rahalahiny nanoloana ny fitolokon’ilay zokiny ka nivoaka ihany koa ary  lasan’ireo dahalo ny vola mitentina 6 tapitrisa Ar  niaraka tamina vidin’entana mitentina 6.300.000 Ar. Mbola novakian’ireo dahalo ihany taorian’izay ny parebrise-n’ilay kamiao nijanona teo an-tokotany,  saika hodorany ihany koa ny traktera. Olona efatra hatreto no efa tratra. Mangataka ny  handraisan’ny fitondram-panjakana andraikitra manoloana ny firongatry ny asan-dahalo any amin’ity kaominina iray ity ny mponina. Toraka izany koa ny tsy tokony hakana am-bavany sy hanaovana fanadihadiana azy 4 mirahalahy ireto any Miarinarivo fa alefa avy hatrany aty Antananarivo mba ho hitam-poko, hitam-pirenena. Mahatsiaro mangirifiry loatra mantsy izy ireo noho ny fisian’ireo dahalo tratra dia votsotra ka  mamaly faty ny mponina  rehefa tafaverina eny anivon’ny fiaraha-monina indray.

Pati

Tia Tanindrazana

Samia mijoro ho an'i Gasikara.