MPISANDOKA HO

MPITANDRO NY FILAMINANA

Fandriampahalemana
Alakamisy 04 Desambra 2025

Efatra mianadahy nadoboka eny Antanimora

Voasambotry ny Polisy misahana ny heloka bevava Anosy ny tambazotra iray mpanao ratsy izay nisandoka ho mpitandro filaminana. Ny fomba fanaony dia manatitra taratasy fiantsoana sandoka amin’olona izay efa fantatr’izy ireo mialoha izy 4 mianadahy. Vantany vao mahazo ilay taratasy sandoka ho fiantsoana ilay lasibatra dia misy olona iray hafa milaza fa mahafantatra manam-pahefàna ka afaka « mandamina ny raharaha » ary mitaky vola be ho takalon’izany. Ankoatra izay efa voa dia olona roa samy hafa no nametraka fitoriana amin’ity raharaha ity teny amin’ny BC Anosy. Nanao ny fanadihadiana sy fikaroham-baovao ary nametraka vela-pandrika ny Polisin’ny BC ka olona efatra, vehivavy ny iray, izay samy nandray anjara tamin’ity raharaha maloto ity no voasambotra nanomboka ny 25 ka hatramin’ny 29 Novambra lasa teo.Taorian’ny fiakaran’izy ireo Fampanoavana ny 01 Desambra teo dia nidoboka am-ponja teny Antanimora avokoa izy efatra.
Pati
Légende : Ireto izy 4 mianadahy sarona !