Mpanendaka natahototra fitsaram-bahoaka

Nitsoraka tany anaty rano, tsy fantatra na maty na velona

Fandriampahalemana
Talata 09 Janoary 2024

Hay matahotra fitsaram-bahoaka ihany ireny mpanendaka ireny rehefa tena tapi-dalan-kaleha.

Mpanendaka iray omaly Alatsinainy 08 Janoary no niantso vonjy tamin’ny mpaka fasika teny amin’iny digy lalovan’i Ranon’Ikopa iny rehefa avy nanendaka vehivavy iray monina ao Anosizato Anosimahavelona. Nanohitra avy hatrany mantsy ilay vehivavy no sady niantso vonjy ka ankoatra ireo fokonolona tonga nanavotra azy dia feno mpilalao baolina kitra nitangorona ihany koa teo akaikiny. Natahotra ireto farany ilay mpanendaka ka nitsoraka tao anaty rano. Tsy nahay nilomano anefa izy nandritra izany ka nangataka famonjena tamin’ireo mpaka fasika teny an-toerana indray saingy mbola novelesin’ireto farany tamin’ny hazo. Tsy nipoitra intsony ilay mpanendaka vokatr’izany ka tsy fantatra na maty na velona.
Pati
Legende : Tety amin’ny ranon’Ikopa tety no niseho ny tantara !