Fandriampahalemana

Mpanendaka mitaingina moto Mikendry ireo olona leon’ny fitohanana amin’ny hariva

Fandriampahalemana
Alakamisy 25 Aprily 2019

Mitady hevitra hatrany ireo mpanendaka eto amintsika mba hahazoany vola sy kojakoja entina mody isan’andro. Ankoatra ny sinto-mahery sy ny fanendahana ataon’izy ireo mahazatra dia fantatra fa manomboka mampiasa môtô indray izy ireny ankehitriny ka ireo mpandeha avy ao anaty taksibe leon’ny fitohanana amin’ny harivariva iny no tena lasibatra.

Ho ana renim-pianakaviana avy niasa tany amin’iny faritra Andranobevava iny ny fiandohan’ny herinandro teo dia nitrosona sy niankarapoka tamin’ny tany mihitsy izy vokatry ny fisintoman’ireo mpanendaka ny poketrany ka sady naratra izy no very fananana. Vao ny talata maraina teo ihany koa dia lehilahy iray no lasibatra ka na dia niezaka ny nanenjika ireo mpanendaka aza ireo nanatri-maso dia tsy afa-nanoatra. Tokony ho mailo hatrany ny rehetra manoloana ireny mpanendaka mampiasa môtô ireny. Fa ankoatra izay dia efa miroso amin’ny fanafihana ireo olon-tsotra mitondra môtô ihany koa ireo mpanendaka. Ilay aroloha iny no ezahiny vakiana amin’ny vy be ka rehefa mianjera ilay mpitondra dia entiny manaraka azy mora foana ilay môtô. Toerana maromaro ihany koa no efa nahitana ity tranga ity teto an-drenivohitra.

Pati