Fandriampahalemana

Mpanendaka eny Anosibe Sady manapaka tanana no maka vola

Fandriampahalemana
Alakamisy 22 Aogositra 2019

Mirongatra ny asa fanendahana miaro fandratrana olona eny Anosibe ao anatin’ny Boriborintany fahefatra.

Olona roa isan’andro raha kely no voaendaka eny an-toerana, raha ny fitarainan’ny mponina. Manomboka eo amin’ny lalamby hatrany Anosibe no tena hitrangany. Amin’ny 4 ora maraina izy ireo no manao ny ataony mandrapahazava ny andro. Ireo mpaka entana handeha hiantsena no tena mahita faisana. Mitohy manao ny asa ratsiny indray ny hariva manomboka amin’ny 7 ora raha tara indrindra mandrapahatonga ny amin’ny11 ora alina any ho any. Ankizy vantombantony avokoa ny ankamaroan’ireo mpanendaka ireo raha araka ny fanazavan’ny mponina, eo anelanelan’ny 15 ka hatramin’ny 17 taona. Manao andiany izy ireo ka miisa dimy raha kely indrindra, mahatratra folo kosa ny sasany. Mifandrimbona izy ireo manatanteraka ny asa fanendahany ka ny sasany manambana antsy sady manendaka pôketra na kitapo, ny hata maka avy hatrany ny rojo sy ny peratra ary ny telefaonina. Misy mihitsy ireo sahy manapaka tanana. Mangataka ny mba hisian’ny mpitandro ny filaminana hanao fisafoana matetika eny amin’ity faritra ity ny mponina na koa hametraka borigady eny an-toerana hahafahana manafoana ny asan’ireo mpanao ratsy.

Pati