Fandriampahalemana

Mpandraharaha saika nisy nanafika Voafandrika ireo jiolahy

Fandriampahalemana
Alakamisy 28 Desambra 2017

Tambajotran-jiolahy hanomana fanafihana mitam-piadiana no voasambotry ny polisy misahana ny heloka bevava etsy Anosy, sakelika voalohany, ny sabotsy 23 desambra teo teny Tanjombato.

Nahazo loharanom-baovao ny polisy fa misy olona mitana basy eny Tanjombato iny. Natao ny fanadihadiana sy ny fikarohana ary ny fanarahan-dia ka lehilahy miisa telo no voasambotra. Lehilahy iray antsoina hoe Hery, 30 taona no voasambotry ny polisin’ny SAG teny Tanjombato. Rehefa nosavaina anefa izy dia tsy hita tany ilay basy. Tamin’ny fanadihadiana azy dia nanoro ny namany indray izy ka tratehaky ny polisy tamin’io andro io ihany koa i Francis, 29 taona teny Tanjombato, izay namany ihany. Tsy mbola hita tany aminy koa ilay basy, ity farany no nanoro fa any amin’ilay namany iray ilay basy. Natao ny fisamborana ka tratra teny Tanjombato io sabotsy io koa i Jean Marcelin, 34 taona. Rehefa nohadihadiana izy dia nanoro ny nanafenany an’ilay basy izay nafenina tao anaty tranon’akoho. Basy PA sy bala tsy tena izy miisa 5 sy bala tena izy 1. Tamin’ny fanadihadiana an’i Marcelin dia basy saika hanaovana fanafihana mpandraharaha eny Avaratra Ankatso omaly, alarobia na anio, alakamisy ity basy tratra ity. Efa nigadra teny Antanimora izy izao tratehaka izao indray, raha ny fanamarihana voaray. Natolotra ny fampanoavana omaly alarobia, 27 desambra 2017, ny raharaha.

J. Mirija