Fandriampahalemana

Mpanao trafikam-basy Iray volana tany am-ponja dia afaka

Fandriampahalemana
Alakamisy 21 Desambra 2017

Nikoropaka ny mponina tao Tsararivotra – Sambava omaly raha nahita olona voarohirohy ho mpanamboatra sy mpivarotra basy nefa miriaria eny amin’ny fiarahamonina sahady.

Ny 10 novambra 2017 izy ireo no natolotra ny Fitsarana Ambaratonga voalohany Antalaha taorian’ny famotorana nataon’ny zandarimaria Sambava rehefa nahatrarana basy maro karazany miaraka amin’ny fitaovana fanamboarana izany tao amin’io tanànan’i Tsararivotra io. Iray volana aty aoriana anefa dia tafaverina eny anivon’ny fiarahamonina ireo voarohirohy, ka nanaovana lanonam-be. Nanazava ny Kapiteny Maguy Mahamandina, avy amin’ny kaompanian’ny zandarimaria Sambava fa “efa vita ny asanay avy amin’ny zandarimaria satria efa natolotray ny Fitsarana ny raharaha koa raha tsy ahitana fandikan-dalàna hafa indray tsy mihetsika izahay”.

Nangonin’i Jean D.