Fandriampahalemana

Mpampianatra lasa takalonaina Mitaky 20 tapitrisa Ariary ireo dahalo hamotsorana azy

Fandriampahalemana
Zoma 29 Desambra 2017

Lehilahy iray, mpampianatra ao amin’ny EPP Mananosoa Malaimbandy, distrikan’i Mahabo no nalain’ny dahalo an-keriny ny alalrobia alina teo. Mitaky vola 20 tapitrisa Ariary ireo mpaka takalonaina ho tambin’ny famotsorana azy.

Ny findain’ilay ramose no hifandraisan’ireo dahalo tamin’ny fianakavin’ilay takalonaina hatramin’ny omaly tamin’ny 11ora antoandro. Tsy azo nifandraisana intsony ilay finday taorian’izay. Lany fahana sa inona no nitranga ? Matetika no itrangana fakana takalonaina toy izao any Malaimbandy. Efa amam-polony no lasibatra tamin’izany. Mitaky volabe an-tapitrisany hatrany ireo mpaka takalonaina ho tambin’ny famotsorana ireo babony. Toa zary fitadivam-bola vaovao ataon’ny dahalo amin’iny faritra iny indray io fakana takalonaina io. Fihantsiana fanjakana sy mpitandro ny filaminana tsy misy toy izany ! Ny mahagaga sy mahazendana dia tsy manana vahaolana hifehezana izany ny fanjakana hatramin’izao.

Jean D.