Fandriampahalemana

Moto very tetsy amin’ny parking 67 ha Saika namidy 3 tapitrisa Ar, tratra ilay mpanera

Fandriampahalemana
Alarobia 25 Janoary 2023

Lehilahy iray no voasambotry ny Polisy ao amin'ny Sûreté Urbaine de Tananarive momba ilay halatra moto nitranga ny herinandro lasa teo teny amin'ny Parking 67ha.

Raha tsiahivina kely ny tantara dia moto very tamin'ny 14 janoary izy io, mitondra ny marika Honda 125 ary nanaovan'ny tompony fitarainana. Nisy lehilahy iray milaza fa manana an'izany moto tadiavina izany ka hamidy amin'ny vidiny 3.000.000 Ar izany. Natao ny famotorana rehetra ka tamin’ny 21 janoary teo no nojerena teny amin’ny 67 ha parking ilay moto. Efa nametraka ny vela-pandrika rehetra ny Polisy tamin'izany ka rehefa tonga teo ilay mpanera dia niantso ilay namany manana ilay moto. Vao hitan'ity farany avy lavitra anefa ilay tompona moto very dia lasa nandositra avy hatrany izy niaraka tamin'ny moto. Nosamborina avy hatrany ilay mpanera raha tafatsoaka kosa ilay namany niaraka tamin'ny moto ka nentina tany amin'ny birao nanaovana fanadihadiana. Fantatra nandritra ny fanadihadiana fa 1.000.000 Ar no anjaran'ity mpanera ity rehefa lafo ilay moto halatra. Milaza kosa izy fa tsy mahafantatra na halatra na tsia ilay moto. Natolotra ny fampanoavana afak’omaly alatsinainy ka naiditra am-ponja vonjimaika ilay mpanera saika hivarotra ilay moto.
Pati
Legende : Ity ilay mpanera moto nalefa eny Antanimora