Fandriampahalemana

MIRONGATRA NY FANJIFANA RONGONY

Fandriampahalemana
Zoma 20 Novambra 2020

1- Tovolahy 18 taona no mpamatsy “Heroine” eny 67 Ha Ahiana tsy ho voafehy intsony ny fivarotana zava-mahadomelina eto amintsika.

Tovolahy vao erotrerony roa izay samy 18 taona no tratran’ny Polisy miasa ao amin’ny STUP Anosy teny amin’ny 67 ha ny 18 novambra 2020 lasa teo tokony ho tamin’ny 1 ora atoandro. Nivarotra heroine izy ireo raha araka ny fantatra. Tafiditra hatrany amin’ny fanenjehana hataon’ny Polisin’ny STUP Anosy amin’ny fiparitahan’ny zava-mahadomelina izay mitarika fitondran-tena tsy mendrika eny anivon’ny fiaraha-monina izao fisamborana izao. Heroine milanja 1,23gr no tratra teny amin’izy ireo nandritra izany. Araka ny fantatra dia mividy 1gr izy amin’ny vidiny 50.000 ariary ; tsinjarainy ho 07 izany ka hamidiny 5000Ar ny iray avy eo. Natolotra ny fampanoavana ny 19 novambra teo izy roalahy. Tsy vao izy roalahy ireto no saron’ny polisy namatsy sy nivarotra “Heroine” fa efa maro, ary voatondro fa ireo teratany vahiny sy olona manan-katao no tena manjifa ity rongony mahery vaika ity eto Antananarivo.

Mety efa lasa tahaka ny fanampin-tsakafo mihitsy angamba ny fifohana rongony raha mandinika ny vaovao satria dia olona miisa 4 indray no voasambotry ny polisy miasa ao amin’ny STUP Anosy tamin’ny faritra samihafa teto an-drenivohitra ny 18 novambra lasa teo noho ny resaka fivarotana sy fifohana zava-mahadomelina. Vehivavy ilay iray tratra voalohany teny Manjakaray tokony ho tamin’ny 10 ora maraina. 35 taona izy io ary mbola nahitana rongony 14 fonosana teny aminy nandritra ny fisamborana azy. Raha araka ny fanazavany dia hamidiny 1.000 Ar ny fonosana iray amin’ireo rongony tratra teny aminy ireo. Mbola vehivavy koa ilay faharoa izay efa 43 taona. Teny amin’ny faritr’Amboanjobe indray no tratra ity farany tokony ho tamin’ny 1ora tolakandro tamin’io andro io ihany. Rongony 16 fonosana indray no tratra tany aminy izay hamidiny 1.000 Ar ny fonosana iray. Teny Ambohimanarina kosa tokony ho tamin’ny 11 ora atoandro no tratra ny lehilahy iray 27 taona izay nahatrarana fonosan-drony miisa 19 fonosana . Vidiany 5.000 Ar ny fonosana lehibe ka tsinjarainy ary hamidiny 1000 Ar ny fonosana kely. Mahalafo 05 fonosana isan’andro izy raha ny fanazavany. Ny lehilahy faharoa kosa dia 32 taona, voasambotra teny Ivanja Ambohitsoa. Ity farany indray dia mifoka ka mahalany 1 fonosana isan’andro ary mbola nisy fonosan-drongony 15 isa tao aminy izay vidiany amin’ny olona mpandalo. Natolotra ny fampanoavana omaly avokoa izy 4 mianadahy ireo.

Pati