Fandriampahalemana

Mampiditra 30 000 Ar isan’andro Mirongatra ny halatra Cyclo-pousse ao Toamasina

Fandriampahalemana
Alakamisy 03 Aogositra 2023

Fotoanan’ny fialan-tsasatra lehibe izao. Betsaka ireo olona avy eto an-drenivohitra no miondrana mankany amin’ny faritra mba haka rivotra toy ny hita ao Toamasina sy Mahajanga ao.

Mikarama fatratra noho izany ny cyclo-pousse sy ny bajaj. Mampiditra 30.000 Ar isan’andro ny cyclo-pousse iray raha kely ankoatra ny vola entin’ny mpamily mody any amin’ny vady aman-janany. Tsy vitsy ireo miketrika mba hanana azy ireny noho izany, antony manosika ny sasany hangalatra. Lehilahy iray 29 taona no voasambotry Polisy tao Tanambao V Toamasina afak’omaly Talata 01 aogositra tokony tamin'ny 12 ora rehefa nangalatra cyclo-pousse. Polisy nanao fisafoana teny an-toerana no naheno fokonolona niantsoantso fa misy mpangalatra cyclo-pousse saika hitondra izany avy hatrany hitsoaka. Niroso tamin'ny fisamborana avy hatrany ny Polisy ka tra-tehaka tamin’izany ity lehilahy ity. Noentina avy hatrany teny amin'ny biraon'ny polisy izy ho fiarovana ny ainy raha hiakatra fitsarana anio Alakamisy kosa ny raharaha. Efa misy tambajotra mihitsy moa ny mpangalatra cyclo-pousse ao Toamasina ao.
Nangonin’i Pati
Legende : Ity ilay ranamana tratra nangalatra cyclo-pousse